༄༅།། ཆུམས་མདའ་རྒྱུད་ཁང་ནི། སྤྱི་ལོའི་དུས་རབས་བཅོ་ལྔ་པའི་ནང་རྒྱུད་ཆེན་ཀུན་དགའ་དོན་གྲུབ་མཆོག་གིས་ཕྱག་བཏབ་པར་གྲགས། འདི་ནི་རྒྱུད་ཆེན་མཆོག་གིས་ཐོག་མར་དབུས་སྟོད་བྱམས་པ་གླིང་དུ་དཔལ་ལྡན་སྟོད་རྒྱུད་གྲྭ་ཚང་ཕྱག་བཏབ་ཟིན་པའི་རྗེས་སུ་རྒྱུད་ཀྱི་ཆོས་འཆད་ཉན་དང་ཆོས་ཐོག་འགྲིམ་སའི་ཆེད་དུ་རྒྱུད་ཁང་འདི་གསར་བཞེངས་མཛད་པ་ཡིན་ཤས་ཆེ། གནས་འདིར་བོད་ཟླ་༣ ཚེས་༡༥ ནས་ཚེས་༢༡ བར་སྟག་རྩེ་ཆོས་ཐོག་ཡིན། འདིའི་རིང་ཞལ་འདོན་གསང་འདུས་བདག་མདུན་གཉིས་ཉིན་རེར་ཚར་གསུམ་རེ་དང་། དྲུག་ཅུ་མའི་གཏོར་རྒྱག་བཅས་ཡོད།
བོད་ཟླ་༣ ཚེས་༢༢ ནས་བོད་ཟླ་༤ ཚེས་༢༧ བར་ཀློག་པ་ཐོས་བསམ་གྱི་འཁོར་ལོ་ཆུམས་མདའ་དཔྱིད་ཆོས་ཆེན་མོ། འཚོག་ཡུལ་ཆུམས་མདའ་སྟག་རྩེ་དང་མཚུངས། འདིའི་རིང་བླ་མ་རྒྱུད་མཆོད་དང་འབྲེལ་ཆོས་འཆད་ཉན་ལ། པཎ་ཆེན་བསོད་ནམས་གྲགས་པའི་གསང་འདུས་བསྐྱེད་རྫོགས་དང་། རྗེ་བཙུན་ཀུན་དགའ་དོན་གྲུབ་ཀྱི་གསུང་རྒྱུད་ཊཱིཀ་རིམ་གཉིས་གཏེར་མཛོད། འཇམ་མགོན་བླ་མ་ཙོང་ཁ་པ་ཆེན་པོའི་གསུང་གསང་འདུས་རྒྱུད་འགྲེལ་ཆེན་མོ་(འགྲེལ་པ་བཞི་སྦྲགས་)བཅས་གནང་བ་དང་། ཆུམས་མདའ་བསྐང་གསོ་ཆེན་མོའི་སྐབས་རྔམས་པ་སྒྲ་སྒྲོག་བཀའ་རྒྱ་མ་དབྱངས་འཐེན་རྒྱུ་དང་། གསང་འདུས་རས་བྲིས་བདག་འཇུག །གསོ་སྦྱོང་ཆེན་མོ། མགོན་ཆོས་བཞིའི་བསྐང་གསོ། ཞི་རྒྱས་དབང་གསུམ་གྱི་སྦྱིན་སྲེག །མགོན་པོའི་སྦྱིན་སྲེག་སོགས་ཡོད།