༄༅། །རྒྱུན་དུ་ནས་ང་ཚོའི་དཔེ་མཛོད་ཁང་གིས་བོད་ཕྱི་ནང་ནས་དཔར་དུ་བསྐྲུན་པའི་གལ་ཆེའི་གསུང་རབ་ཁག་མཁོ་སྒྲུབ་ཞུས་དང་ཞུ་བཞིན་པ་ལྟར། ད་ལན་ཡང་སྐྱབས་རྗེ་བཞག་པ་རིན་པོ་ཆེ་དང་། སེར་བྱེས་ལྷ་རམས་པ་འཇམ་དཔལ་བློ་ཤེས་སོགས་བོད་བཞུགས་དྲན་དབང་མང་པོའི་ལམ་སྟོན་འོག །རྗེ་ཙོང་ཁ་པ་དགོངས་པ་གཞན་དུ་རྫོགས་ནས་ལོ་ངོ་དྲུག་བརྒྱ་འཁོར་བའི་རྗེས་དྲན་གྱི་ཆེད་དུ་དམིགས་ཏེ། དེང་སྐབས་རྒྱལ་སྤྱིའི་དཔེ་བསྡུར་ཐབས་ལམ་དང་ཚད་གཞི་གཞིར་བཟུང་ཐོག་ནས། གྲགས་ཅན་དཔར་མ་ཁག་སྟེ། གཙང་དཔར་དང་། ཞོལ་དཔར། སྐུ་འབུམ་དཔར་མ། བླ་བྲང་དཔར་མ་བཅས་དང་དཔེ་བསྡུར་ཞུས་ཤིང་། མི་རིགས་དཔེ་སྐྲུན་ཁང་གིས་ཕྱི་ལོ་༢༠༢༠ པེ་ཅིང་དུ་དཔར་ཐེངས་དང་པོ་བརྒྱབ་པར་གསལ་བའི་འཇམ་མགོན་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ཡབ་སྲས་གསུམ་གྱི་གསུང་འབུམ་ཆ་ཚང་དང་། གཞན་ཡང་༸གོང་ས་སྐུ་ཕྲེང་བཅུ་གསུམ་པ་༸རྒྱལ་དབང་ཐུབ་བསྟན་རྒྱ་མཚོའི་གསུང་འབུམ་ཆ་ཚང་དང་། བཙན་པོའི་ཡིག་རྙིང་གི་ཚིག་མཛོད། ཏུན་ཧོང་ཡིག་རྙིང་ལས་རྙེད་པའི་ནང་བསྟན་ཆོས་གཞུང་བོད་འགྱུར་མ་དང་སྟག་ལུང་ཆོས་འབྱུང་སོགས་གལ་ཆེའི་གསུང་རབ་དང་བརྩམས་ཆོས་རིགས་མི་ཉུང་བ་ཞིག་བླུ་ཡོན་ཞུས་པ་བཞིན་ཕྱི་ལོ་༢༠༢༡ ཟླ་༩ ཚེས་༢༤ ཉིན་དཔེ་མཛོད་ཁང་དུ་དངོས་སུ་གདན་ཞུ་བྱས་ཏེ་འགྲོ་བའི་མུན་སེལ་སྒྲོན་མེ་རུ་དངོས་སུ་བཞུགས་ཡོད་པས། མདོ་སྔགས་རིག་པའི་གནས་ལ་དུང་ཞེན་དང་དད་འདུན་ཟབ་པའི་དོན་གཉེར་ཅན་རྣམས་ཀྱི་ཐུགས་ཕན་གསོ་བྱེད་ཀྱི་རྒྱུར་འགྱུར་ཐུབ་པའི་རེ་བ་ཧ་ཅང་ཆེ།