ཡོན་ཏན་དང་པོར་སློབ་དཀའ་ལ།།
ཤེས་བཞིན་མེད་ན་ཉམས་པ་སླ།།
ཆུ་ཐིགས་བསགས་པས་འགེངས་དཀའ་ཡང་།།
བོ་ན་ཅིག་ཅར་ཉིད་དུ་འཛད།།
ཀུན་དང་མཐུན་པ་རྩ་བ་ཡིན་མོད་ཀྱང་།།
མཐོང་ཚད་ལད་མོ་བྱས་ན་ཀླད་མེད་ཡིན།།
སྐད་རིགས་ཐམས་ཅད་ཤེས་ན་བཟང་མོད་ཀྱིས།།
རང་གི་ཕ་སྐད་བརྗེད་ན་ངོ་ཚ་ཡིན།།
སློབ་པའི་དུས་སུ་མ་གསན་ན།།
ཆུ་ཚགས་བཞིན་དུ་ཆུས་མི་བཀང་།།
བསླབས་རྗེས་ཡང་ཡང་མ་སྦྱངས་ན།།
རྨི་ལམ་བཞིན་དུ་ཁེ་ཕན་མེད།།
མཁས་པ་སློབ་པའི་དུས་ན་སྡུག །
བདེ་བར་སྡོད་ལ་མཁས་མི་སྲིད།།
བདེ་བ་ཆུང་ལ་ཆགས་པ་དེ།།
ཆེན་པོའི་བདེ་བ་ཐོབ་མི་སྲིད།།
སྨྲས་ཤིང་བསྐུལ་བར་གྱུར་པ་ན།།
དུད་འགྲོ་ལ་ཡང་གོ་བ་སྐྱེ།།
མ་བསྐུལ་གཞན་གྱིས་མ་སྨྲས་པར།།
བསམ་པ་ཤེས་ན་མཁས་པ་ཡིན།།
བཤེས་ལ་མི་གུས་སྐྱེ་བོ་དེས།།
གཞུང་བརྒྱ་ཤེས་ཀྱང་དོན་མི་འགྲུབ།།
ཤིང་སྐམ་ལོ་བརྒྱ་ཆུར་འཕངས་ཀྱང་།།
ལོ་འདབ་སྐྱེ་བ་སྲིད་ན་མེད།།
བརྩོན་པ་དག་དང་བྲལ་གྱུར་ན།།
དོན་ཆུང་ཡིན་ཡང་འགྲུབ་པར་དཀའ།།
བརྩོན་འགྲུས་ལྡན་ན་ཡོན་ཏན་ཀུན།།
རང་གི་ལག་ན་གནས་དང་མཚུངས།།
མ་བསླབས་ཁ་རོག་འདུག་པ་ལ།།
ལོ་བརྒྱ་སོང་ཡང་བཟང་སྐྱེད་མེད།།
མཁས་པའི་སྤྱོད་ཡུལ་ཐོབ་འདོད་ན།།
བརྩོན་པས་དཀའ་བ་དང་དུ་ལོངས།།
གང་ཞིག་ཉུང་ངུས་ཆོག་ཤེས་པ།།
དེ་ཡི་ལོངས་སྤྱོད་ཟད་མི་ཤེས།།
ཆོག་ཤེས་མེད་པར་ཚོལ་བ་ལ།།
སྡུག་བསྔལ་ཆར་བཞིན་རྒྱུན་དུ་འབབ།།
རང་སྐྱོན་མཁས་པ་རྣམས་ཀྱིས་ཀྱང་།།
སྐྱོན་དུ་གོ་བ་ཤིན་ཏུ་དཀའ།།
མང་པོས་བདག་ལ་དེ་སྒྲོགས་ན།།
སྐྱོན་ཅན་ཡིན་པར་རྗེས་སུ་དཔོག །
རང་གིས་ལེགས་པར་ཤེས་ན་ཡང་།།
བྱ་བ་ཐམས་ཅད་གྲོས་ཀྱིས་བསྒྲུབ།།
མི་གང་གྲོས་ལ་མི་དགའ་བ།།
འགྱོད་པ་རིན་གྱིས་ཉོ་བ་ཡིན།།
ཟས་དང་སྨན་གྱི་ཚོད་བཞིན་དུ།།
བྱ་བ་གང་དང་ཅི་ལ་ཡང་།།
དུས་དང་བསྟུན་པའི་ཚོད་ཤེས་ན།།
རྒུད་པ་ཆེན་པོས་མནར་མི་འགྱུར།།
རང་ལ་བློ་གྲོས་མི་ལྡན་ན།།
བློ་ཆེན་གཞན་ལ་ལེགས་པར་འདྲི།།
ལག་པས་དགྲ་བོ་མི་གསོད་ན།།
མཚོན་ཆ་ལེན་པར་མི་བྱེད་དམ།།
ལེགས་པར་བརྟགས་ནས་བྱེད་པ་ལ།།
བྱ་བ་ཉམས་པ་ག་ལ་སྲིད།།
མིག་ལྡན་བརྟགས་ནས་འགྲོ་བ་ན།།
གཡང་སར་གོམ་པ་འདོར་རམ་ཅི།།
རྟག་ཏུ་གཞན་དོན་མི་སེམས་པ།།
དེ་ཡི་སྤྱོད་པ་ཕྱུགས་དང་མཚུངས།།
བཟའ་བཏུང་འབའ་ཞིག་དུད་འགྲོས་ཀྱང་།།
བསྒྲུབ་པར་ནུས་པ་མ་ཡིན་ནམ།།
ཕན་དང་མི་ཕན་མི་དཔྱོད་ཅིང་།།
བློ་དང་ཐོས་པ་མི་སྒྲུབ་པར།།
ལྟོ་འགྲངས་འབའ་ཞིག་དོན་གཉེར་བ།།
སྤུ་མེད་པ་ཡི་ཕག་པ་ཡིན།།
བློ་གྲོས་རྩལ་དང་མི་ལྡན་ན།།
གོ་ས་མཐོ་ཡང་ཁྲེལ་བའི་གཞི།།
ཤིང་ལས་བྱས་པའི་སེང་གེ་དེ།།
འཇིགས་འཇིགས་འདྲ་ཡང་སྙིང་པོ་མེད།།
བློན་དང་འབངས་ཀྱིས་མ་བཀུར་ན།།
རྒྱལ་པོ་ཆེན་པོ་ཇི་ལྟར་གནས།།
གདུང་མ་ཀ་བས་མ་བཏེགས་ན།།
རྒྱལ་པོའི་ཕོ་བྲང་གང་ལས་བྱུང་།།
རྟག་གུས་བརྩོན་པ་མ་བཏང་ན།།
མི་འགྲུབ་བྱ་བ་ཅི་ཡང་མེད།།
ཆུ་ཐིགས་རྟག་ཏུ་འབབ་པ་ཡིས།།
བྲག་གི་རི་བོ་འབིགས་ལ་ལྟོས།།
ངན་པར་ཅི་ཙམ་ཕན་བཏགས་ཀྱང་།།
ལན་དུ་ཕན་པའི་རེ་བ་མེད།།
ཤིང་གིས་རྟག་ཏུ་མེ་གསོས་ཀྱང་།།
མེ་ཡིས་དེ་ཉིད་ཐལ་བར་བྱེད།།
གཞན་གྱི་སྐྱོན་ཡོན་མཐོང་སླ་ཡང་།།
རང་གི་སྤྱོད་ཚུལ་མཐོང་བར་དཀའ།།
མཚོ་ནང་ནམ་མཁའི་ཟླ་སྐར་ཀུན།།
གསལ་ཡང་རང་གི་གཏིང་མི་མཐོང་།།
ལྷན་སྐྱེས་ཡོན་ཏན་མེད་གྱུར་ན།།
ཕྱི་ཚུལ་བཅོས་པ་ཅི་ལ་ཕན།།
ཡལ་འདབ་མེད་པའི་ཤིང་སྐམ་དེར།།
ཅོད་པན་བཏགས་ཀྱང་ག་ལ་མཛེས།།
ཤེས་རབ་རྒྱ་ཆེར་འཕེལ་བའི་སྒོ།།
ཐོས་པ་ཡིན་པ་དེ་ཡི་ཕྱིར།།
འབད་དེ་ཐོས་པ་མི་འཚོལ་བར།།
མནོག་ཆུང་བྱ་བ་ཅི་ཞིག་བྱ།།
ཙ་རིའི་གནས་སྐོར་བྱེད་པ་མིང་གི་དོན།།
ཚ་གྲང་དཀའ་ཐུབ་བྱེད་པ་ལྟོ་ཡི་དོན།།
ཛ་ཡའི་གསུང་རབ་ཀློག་པ་ཡོན་གྱི་དོན།།
ཝ་ལེར་བསམ་ན་ཐམས་ཅད་ནོར་གྱི་དོན།།
ཉིན་རེ་ཟས་ཀྱང་མི་དྲན་བརྩོན་འགྲུས་རྩོམ།།
ཞུགས་མ་ཐག་ནས་མཁས་པའི་གོ་འཕང་འདོད།།
ཞག་གསུམ་ལོན་ཚེ་རྗེས་མེད་གཡེང་བས་ཁྱེར།།
དེ་འདྲ་དེ་ལ་ཅི་ཡང་མི་ཡོང་བས།།
བརྩོན་པ་ཆུ་བོའི་རྒྱུན་བཞིན་སྟེན་ཅིག་ཨང་།།
གཞུང་ཚིག་མང་དུ་བཟུང་སྟེ་བསྐྱར་ན་ཡང་།།
དོན་ལ་མི་སེམས་རིམ་གྲོའི་ཆོས་ཀློག་དང་།།
ནེ་ཙོའི་འདོན་པ་ལྟ་བུའི་བརྒྱ་ཚར་གྱིས།།
བརྗོད་བྱའི་གནད་ལ་སྒྲོ་འདོགས་མི་ཆོད་པས།།
དོན་ལ་བརྟག་དཔྱད་ཞིབ་མོ་གྱིས་ཤིག་ཨང་།།
དོན་གྱི་རྒན་པོ་ཚིག་གི་འཁར་བ་ལ།།
བརྟེན་ཕྱིར་གཞུང་ཚིག་བློར་འཛིན་མི་བྱེད་པར།།
དཔེ་ཀློག་ཙམ་དང་ངག་སྒྲོས་ཐན་ཐུན་གྱིས།།
ཉིན་རེ་འགྲོ་ཐབས་དེས་ཀྱང་མི་ཕན་པས།།
དཔེ་འཛིན་སྐྱོར་སྦྱང་ཡུན་དུ་གྱིས་ཤིག་ཨང་།།